xov tooj cua YEEJKAVTSWJ12XEEM

xov tooj cua nrov thoob qab ntuj yog peb hmoob lub xov tooj cua qhia tshuaj ntsuab thiab hmoob tej txuj ci, yog tias koj los yog koj muaj neeg muaj mob muaj nkeeg ho tuaj peb sib cog kawm thiab sib cog qhia.

Tsis muaj koj lawm

Wb sib sib hlub los txog hnub no. cas hnub no kuv ho yuav hnov thiab paub tias koj yog luag tug. Mob kuv lub siab kub lug yam tsis muaj ib yam yuav los kho tau, ntsia lub ntiaj teb no kiv pes lees vim yog kuv lub siab ruam hlub koj dhau qhov hais tau thiab ua txhua yam uas sawv kev tsim kom tau thiab yog ib tug neeg uas hlub koj rau tiam no. Puas yog kuv ruam koj thiaj ua tau li no rau kuv thiaj tsis paub tsis pom kuv txoj kev hlub koj. Lub neej no txawm kuv yuav hlub hlub koj npaum twg thiab npaum li cas los ntshe yuav mus tsis taus.

Cia kuv mam zam kev rau koj. Yog muaj ib hnub koj pom thiab paub tias luag tsis hlub koj no los ho tig rov los seb kuv tus uas koj hlub puas tseem nyob thaj chaw qub thiab puas tseem yog tus qub uas hlub hlub koj yav tag los. Sib ncaim hnub no thov koj mus zoo, saib xyuas koj tus kheej hnub twg koj nco txog kuv los ntsia seb sab ntuj twg tsaus nti ces kuv nyob sab ntawv qhia thiab txhais tias kuv nyob tau zoo li ntawv thiab kuv txoj kev hlub uas yav tag koj tsis pom thiab tsis paub es tsaus npaum li thiab zoo tam li  sab ntuj ntawv.

Lub neej no kuv lub siab tsuas hlub taus tus neeg uas muaj lub siab hlub kuv tiag tiam sis zoo tam li kuv txoj hmoo tsis muaj es koj thiaj tsis hlub kuv. Kuv mam nyob ib leeg zoo li no yog tias hnub twg kuv nco txog koj cia kuv mam mus muab seev rau nrog huab nrog cua seb puas yuav npau suav rov los sib pom mog.

 

                                                                 NpV                                      

Thaum tseem muaj koj

Tus hlub thaum tseem muaj koj nrog kuv nyob zoo tam li lub ntiaj teb no nyob tshav ntuj nrig tsis xav kom txawj laus xav nrog koj nyob kaj siab lug tsis muaj dab tsi los tav tau koj thiab kuv txoj kev hlub.

Lub caij no kuv tsis muaj koj kuv nyob ib leeg  hnub ntev cuag li hli, hli tig mus ua xyoo, kuv lub siab nyob tau ntxhov nyho, lub ntuj tsaus nti xav tuag nrog lub caij nyoog mus kom txhob hnov txhob pom txhob paub es thiaj tsis hnov mob kuv lub siab ncu nco li no. Kuv txoj kev nco koj ua pab ua pawg, tus kuv hlub txoj kev hlub dhau mus lawm tiag tiag tus neeg kuv hlub kuv ces nim no zoo tam li lub paj tawg tau tshiab thaum ntxov tab sis nim  no lub paj ntawv tuag nrog caij nyoog es tus neeg uas hlub kuv thiaj hloov dua siab mus rau luag.

Ntawm wb txoj kev hlub, qhia rau koj tias kuv hlub koj heev nco koj txhua lub caij nyoog nawb mog, koj zoo tam li lub kaus roos tshav ntuj kub tiv nag los ntub kuv rau txhua txhia lub caij nyoog los txog rau hnub no cas yuav zoo tam li lub kaus ntawv raug nyiag mus lawm saib thiab nrhiav qhov twg los tsis pom li. Hnub no koj puas paub tias tshav kub kuv thiab los nag ntub kuv heev rau txhau lub caij nyoog.

Tus me neeg kuv hlub cas hnub no txoj kev hlub zoo tam li tus dej ntws tsis muaj hnub rov, cas koj tseem niaj hnub khuam rawv kuv nruab siab nco tsim duj dheev, me nraug hmoob tus kuv hlub thiab nco cas koj siab phem dag kuv los hlub, koj tso kuv los nyob nrog lub siab mob nrog rau lub caij nyoog no. Txoj kev hlub ncaim zuj zus mus deb lawm tiag Txog rau hnub no kuv lub siab tseem mob ncus nco tsis xav hlub leej twg ntxiv tsis xav npaj lub neej dua tshiab.

Muab txoj kevhlub nrog txoj kev mob tso los kav kuv lub siab lub ntsws cia ploj nrog lub caij nyoog no mus kom tiam no txhob tau taug ib zaug ntxiv  uas yog txoj me kev lwj ntsws no. txawm yuav ncaim mus deb lawm los kuv yeej nco ntsoov, txawm sij hawm dhau mus los kuv lub siab tseem tsis tau hloov. Hnub no ntsias qab ntug ntsuab xiab nrog lub ntuj hu, tseem  nco txog yav tag uas koj nyob zaum puag kuv. Ncaim zaum no ces yuav mus ib txhis yuav tsis muaj hnub rov los ua tau ib yig.

                                                            TSEEM NCO

                                                                                                           ScV

Kev Hlub Ntawm Kuv Rau Koj

Kev hlub ntawm Kuv rau Koj

Ua neej nyob yog tsis muaj kev hlub ces yeej tsis xav ua neej. Kuv hlub koj es koj hlub kuv ces thiaj li muaj txoj kev cia siab. Txhua yam kuv ua rau koj los ntawm kev hlub koj thiab hauv kuv lub siab hlub koj. Tab sis hauv koj lub siab hlub kuv thiab txoj kev koj hlub kuv ho muaj dab tsi rau kuv kom tsim nyog kuv txoj kev hlub koj. Ib txoj kev hlub twg yuav loj hlob yuav yog los ntawm ob leeg lub siab ncaj ncees zoo tam li ib lub noob uas tau muab cog rau hauv av lawm ces yeej xav kom lub noob ntawv txawj hlav kaus mam loj hlob kom tawg tau paj txi tau txiv. Hnub no kuv hlub koj npaum twg los tsuas yog kuv xwb tsis muaj koj zoo tam li lub noob yuav muab ntsaws rau hauv av es yuav tsis txawj tuaj kaus ces ntshe yuav tsis txawj tawg tau paj txi tau txiv li..

 Thaum koj hais koj tej lus rau kuv muaj kuab ruaj khov xav tias yuav muaj tiag thiab ua tau tiag los txog hnub no ua li cas zoo li lub ntuj huv si tiam sis muaj huab nyob tsaus nti.  Zoo tam li tus mob nchiav loj zuj zus mob kuv heev tsis paub tias xyov mob qhov twg tuaj xav nyob zaum tsaws quaj seb siab puas nqeg. Tus kuv hlub ntshe koj yuav zoo siab nyob luag ntxhi vim koj lub siab hlub tiag tsis muaj rau kuv. Koj tej lus hais rau kuv tiam neej no koj yog kuv li kuv yog koj tug koj yuav los nyob pw nthi hauv kuv lub xub ntiag mus ib txhis cia kuv ua pa ntshuj ntshi rau koj mloog. Hnub no tej lus koj hais tseg cia kuv khaws ua hauv tshuaj kho kuv tus mob kom kuv paub tias tiam no los hlub koj thiab yuav hlub koj tsawg zaus los tsis muaj txoj hmoo zoo.

 Kuv txoj kev xav kev ntshaw ntawm koj ces xav luaj ntuj xu luaj teb. Xav qhov zoo los tsis  tau zoo. Xav qhov phem ces tsuas tau kev lwj siab. Kev hlub ntawm koj thiab kuv yog koj hlub kuv li kuv hlub koj,  wb ib leeg mloog ib leeg ces lub neej tsuas muaj ib nqag nto ntuj ib nploog nto ntsi. Kev hlub yuav nyob  mus ib txhiab kom tag mus ib txhis.

Nov yog kuv txoj kev hlub koj rau tiam no.

                                                                                               KuvLubSiab              

title

Add your main content here - text, photos, videos, addons, whatever you want!